KYUN

kyun hai mann mein

sawal kuch ankahe

kisse pooche inhe

kisse ja k kahe

kyun hai ateet ke

kuch nishaan dhule se

jinko dhoondate hue

hain khud ko bhoole se

jagti aankhoin se hardin

dekha tha vo ek sapna

toot gaya jab vo toh

kyun raha na kuch apana

bujhey armaano ki kabr pe

naya ashiyaan ban toh liya

par dil mein uthati kasak ko

kaise karein ham bayan 

bas chale ja rahe hai

dil mein liye viraaniya

jaane kitane fasle hai

khud se khud ke darmiyaan

kehete hain sab log yahi

hasta hai chehera ye sada

kabhi jhaank ke dekha hi nai

dil ki hakeekat hai kya

ab aankhoin par hai fir

kuch naye naye se khwab

shayad fir mil jaayein ab

un sawaaloin ke jawab

ab le li hai

zindagi ne nai disha

lagta hai is seher ki

na hogi ab nisha

KUCH KAMI HAI

Chand vahi hai sitare vahi hai

Par maa tera anchal nahi hai

Khushiya vahi hai bahare vahi hai

Par ye mann chanchal nahi hai

Dhoop vahi hai chaya vahi hai

Papa aapka saya nahi hai

Aapki god se hat kar mujhko

Chain kahin aya nahi hai

Rahein vahi h raste vahi hai

Par vo ghar le jati nahi hai

Yadeein vahin h baatein vahi hai

Par apano tak ja pati nahi hai

Teez wahi h tyohar wahi hai

Par unmein vo baat nahi hai

Jab inko manane ko

Privar ka koi saath nahi hai

Dard wahi h aansu vahi hai

Par unka ehsaas nahi hai

Kandhe pe rakh sar rone ko

Aapna koi pass nahi hai

Dil se sab hai saath magar

Milo ki ye doori hai

Apano ke pyar bina

Har khushi adhoori hai

ATEET KE PANNE

kash ateet ke panno ko

fir palat k padh pate

jo choot gaya hai peeche

usako fir se jee pate

kuch pyari sunhari yaadein

jin mein lab muskaye the

ya kuch vo udas palchin

jin mein aansu aaye the

gujare hue vo saare lamhein

ab ban gai jo yaadein hai

dil mein hain kahin chupi hui

ab, jo kal ki baatein hai

aasama ke gehere aanchal si

maa ki vo chunari dhani

kash fir se sun pate

 naani k vo kissi kahani

choti choti aankhoin se

dekhe hue vo bade sapne

jin se do pal mil liye

bann jate the vo sab apane

ndaani masumiyat bhara

apana vo chota sa jahan

kash laut ke ja pate ab

ham sab fir se vahan

gujara hua vo kal

laut ke fir na ayega

ab bas yaadein ban

khwaboin mein satayega

DARD

kisi ki aankhoin se

aansu bann beheta hai

kisi ki muskurahat ke

peeche se chillata hai

kisi ke zakhmoin ki daastan

khamoshi se sunata hai

ek dard hi toh hai

jo hardam saath nibhata hai

purani yaadoin ki nishani hai

beete lamhoin ki kahani hai

kisi k dil ki cheekh

toh kisi ki bejubani hai

kabhi tute rishtoin ki

bikhare spno ki chubhan hai

kahe alfaazoin ki chot

kabhi khamoshiyo ki ghutan hai

gazaloin mein chup kar

ye fir se jee jata hai

kisi kavi ke likhane ki

vajah bann jata hai

ye dard hi toh hai jo hardam saath nibhata hai...

MANN

kyuin reheta bechain mann tu

kya hai uljhan teri

kyuin tu ab tak samjh na paya

jeevan ki ye feri

Banvra sa fir raha kyuin

ghoom raha kyun dar badar

jaane kya dhoond raha tu

chod chaad apani dagar

kisi apane ki khushi dekh tu

bachche sa muskata hai

fir usako udas dekh tu

kyu aansu bahata hai

jaane hai tu samjhta bhi hai

dukh sang sukh bhi aata hai

fir teevra jhonko se tu

kyu vichalit ho jata hai

aapni pyas bujhane ko

karta tu darriya kyu talaash

armaano ke pankh laga ke

chuna chahate kyu aakash

mast nadee sa behta rehta

kyu kahin tu na thamta

besudh banjaro sa firta

jaise ho koi jogi ramta

tarah tarah se dhong rachata

fir bhi tu hi achcha hai

mujhko tu mujhse hai milata

kyuinki tu hi sachcha hai

kyuin reheta bechain mann to

kya hai uljhan teri

kyutu ab tak samjh nia paya

 jeevan ki feri